Техник-технолог

Техник-технолог - өнім өндірісінің әр кезеңінде технологиялық процестерді әзірлеуге және қолдауға жауап беретін маман.

Техник-технолог өнімді дайындау кезінде қойылған талаптардан туындаған ауытқуларды анықтап, қадағалайды және оларды жоюды қамтамасыз етеді. Оның міндетіне жабдықтардың жұмыс істеу принциптерін білу, пайдаланылатын материалдардың қасиеттерін білу кіреді. Сондай-ақ ол қажетті есептеулерді жүргізе отырып, процеске уақтылы өзгерістер енгізе алуы тиіс.

Техник-технолог мынадай жұмыс түрлерін орындайды:

• білікті маманның басшылығымен өнімнің немесе қарапайым бұйымдардың жекелеген элементтерін өндіру процестерін әзірлеу;
• жобаның нормативтік құжаттарға және техникалық тапсырмаға сәйкестігін бақылау;
• шығарылатын өнімнің сапалық көрсеткіштерін қадағалау;
• бұйымды дайындауға кеткен еңбек, шикізат және қаржы шығындарын төмендетуге қатысты ұсыныстар енгізу;
• өнімді дайындау кезіндегі процестердің бірізділігін анықтау және оның сақталуын бақылау; түрлі құжаттамаларды (материалдық, маршруттық, технологиялық карталар, жабдықтау ведомостары және т.б.) дайындау;
• жұмыстың басқа түрлеріне қатысу (патенттік зерттеулер, өндірісте жаңа процестерді енгізу, ақаулықтың себептерін анықтау, оны жою және одан әрі оған жол бермеу жолдарын айқындау).

Еңбекақысы жұмыс орнына, біліктілік деңгейі мен тәжірибесіне байланысты болады. Осы біліктілік бойынша ойдағыдай білім алып, одан әрі жұмыс істеу үшін студенттің физика, химия, математика, сызу саласында білімі болуы тиіс.

Жоғары деңгейдегі маман болу үшін минималды тәжірибе - 2-3 жыл.

Бұл мамандықтың артықшылығы - көптеген технологияларды меңгеруінде, өйткені кез келген өндірісте, құрылыста металлоконструкциялар, станоктар, металл бөлшектері қолданылады. Мансаптық өсу, разрядты көтеру мүмкіндігі бар.

Табысты жұмыс істеу үшін техник-технологтың бойында мынадай бірқатар жеке қасиеттер болуы қажет: жұмыс барысындағы жауапкершілік және жүйелілік, ұйымдастырушылық қасиеттер, коммуникабельділік, логикалық ойлау, еңбекқорлық.

Бұл мамандықтың кемшілігі - маманның жабдық пен қымбат тұратын бөлшектерге материалды жауапты болатындығында.

Жас мамандарға теорияны ғана емес, сондай-ақ процестің мәнін түсіну де маңызды. Бұл кәсіпте үлкен жетістіктерге жету үшін өзін дамытып отыру маңызды.

Қазіргі таңда өнеркәсіп алдын-ала қарастырылған параметрлерге сәйкес өнім шығаруға бағытталған, олардан ауытқуға жол берілмейді. Сондықтан жақын арада еңбек нарығында осы біліктіліктің білікті мамандарына тұрақты сұраныс байқалатын болады.